Не  в  силе  Бог,  а  в  правде!

МОСКОВСКАЯ  ПОКРОВСКАЯ  ОБЩИНА  СЕСТЕР  МИЛОСЕРДИЯ



Статьи
     Меню  сайта

           Статьи
Покрову Пресвятой Богородицы [1]
Акафист и служба Покрову Пресвятой Богородицы
Воскресению Христову [1]
Акафист и служба Воскресению Христову
Преподобному Сергию Радонежскому [1]
Акафист и служба преподобному Сергию, игумену Радонежскому, Чудотворцу
Царевичу Димитрию [0]
Акафист и служба благоверному Царевичу Димитрию Угличскому и Московскому
Преподобному Серафиму Саровскому [1]
Акафист и служба преподобному Серафиму Саровскому, Чудотворцу
Преподобному Михаилу Малеину [0]
Акафист и служба преподобному Михаилу Малеину
Иконе Божией Матери "Знамение" [1]
Акафист и служба пред иконой Пресвятой Богородицы "Знамение" Понетаевской
Равноапостольной Нине [1]
Акафист и служба святой равноапостольной Нине, просветительнице Грузии
Тихвинской иконе Божией Матери [1]
Иконе Божией Матери "Покрывающая" [1]
Введению во храм Божией Матери [0]
Акафист и служба Введению Пресвятой Богородицы во храм
Иконе Богородицы "Неупиваемая Чаша" [0]
Акафист и служба Пресвятой Богородице пред иконой Ее "Неупиваемая Чаша"
Святителю Московскому Филарету [0]
Акафист и служба Святителю Филарету (Дроздову), митрополиту Московскому
Святителю Московскому Иннокентию [0]
Акафист и служба Святителю Иннокентию (Вениаминову), митрополиту Московскому, просветителю Америки и Сибири
Новомученикам Российским [0]
Акафист и служба новомученикам Российским
Преподобному Варлааму Серпуховскому [0]
Акафист и служба преподобному Варлааму Серпуховскому
Великомученице Параскеве [0]
Акафист и служба великомученице Параскеве Пятнице
Святителю Митрофану [1]
Акафист и служба Святителю Митрофану Воронежскому
Праведной Фамари [0]
Акафист и служба праведной Фамари

     Форма  входа

           Поиск

          Система Orphus

  Наш  Опрос  №  1
Что бы Вы хотели видеть на месте Покровской обители?
Всего ответов: 202



Онлайн всего: 1
Гостей: 1
Пользователей: 0




Приветствую Вас, Гость · RSS 18.10.2017, 21:13

Главная » Статьи » Акафисты и службы » Иконе Божией Матери "Покрывающая"

Акафист Божией Матери "Покрывающая"
АКАФИСТ  ПРЕСВЯТОЙ  БОГОРОДИЦЕ
пред  Ея  иконой,  именуемой
"ПОКРЫВАЮЩАЯ"


Кондак 1

   Взбранней Воеводе Царице небеси и земли, даровавшей нам пречудную икону "Покрывающая", благодарственное приносим пение. Ты же, яко Благосердая Мати, не отрини нашего сего моления, но благоволи прияти е, сподоби вопити Тебе тако:
   Радуйся, Владычице мира, от наветов злых духов и человеков нас Покрывающая.

Икос 1

   Ангельский глас услыша Святая Анна извествующь: Ты зачнеши и родиши Дщерь, Преблагословенную Марию, с Ней благословятся все племена земная и приидет спасение всему миру. Сие ведуще возопием Богородице:
   Радуйся, Мати Сына Божия;
   радуйся, Пренепорочная Дево.
   Радуйся, Спаса душ наших родившая;
   радуйся, грешных с Богом примирившая.
   Радуйся, Невместимаго вместилище;
   радуйся, носило всего Божества.
   Радуйся, Божие к смертным благоволение;
   радуйся, смертных к Богу дерзновение.
   Радуйся, честнейшая Херувим;
   радуйся, славнейшая без сравнения Серафим.
   Радуйся, ада и смерти попрание;
   радуйся, вечныя жизни дарование.
   Радуйся, Владычице мира, от наветов злых духов и человеков нас Покрывающая.

Кондак 2

   Видяще святыя Твоя родителие Иоаким и Анна, яко Ты еси, Пречистая, плод Благословенный, возблагодаривша Бога и пред дверьми храма положиша обет посвятити Тя Господу, поя Ему: Аллилуиа.

Икос 2

   Разум совершенный Ты Сама стяжала еси, Богородице, воспитавшися во Святая Святых, тако не престаеши умудряти и просвещати светом богоразумия и вся христианы, вопиющия Ти таковая:
   Радуйся, к Богопознанию приводящая;
   радуйся, к свету истины прельщенныя обращающая.
   Радуйся, страх Божий в сердца вселяющая,
   радуйся, благоговети пред святыней научающая.
   Радуйся, ревностию ко спасению воодушевляющая;
   радуйся, духовное нечувствие в нас подавляющая.
   Радуйся, храмы Божии почитати внушающая;
   радуйся, в них отраду находити вдохновляющая.
   Радуйся, жажду Святаго Причащения возбуждающая;
   радуйся, веру и любовь к Богу воспламеняющая.
   Радуйся, чистоты и целомудрия Поборнице;
   радуйся, добрыя христианския жизни Споспешнице.
   Радуйся, Владычице мира, от наветов злых духов и человеков нас Покрывающая.

Кондак 3

   Сила Вышняго осени Тя, Благодатная, егда Архангел Гавриил благовествоваше о безсеменном зачатии из Тебе Сына Божия, Спасителя миру. Прияв сию благую весть со смирением, яко раба Господня, возопила еси Богу: Аллилуиа.

Икос 3

   Имуще во утробе Христа Жизнодавца, востекла еси, Благословенная, к южике Своей, праведней Елисавете и "целовастася обе матери", радуяся о Бозе Спасе нашем. Сего ради, яко источнику святыя радости, вопием Ти сице:
   Радуйся, тяжкое житие наше облегчающая,
   радуйся, лютыя беды и напасти отгоняющая.
   Радуйся, от душевныя туги и уныния спасающая;
   радуйся, безпомощным на помощь ускоряющая.
   Радуйся, испытания Божия за благо приимати указующая;
   радуйся, в самих страданиях утешение подающая.
   Радуйся, яко Тобою злые начинания пресекаются;
   радуйся, яко тобою добрые желания наша исполняются.
   Радуйся, огнем Матерния Твоея любве души согревающая;
   радуйся, благодатию Святаго Духа нас озаряющая.
   Радуйся, всех скорбящих и угнетенных Мати Благосердая;
   радуйся, мира христианского Заступница усердная.
   Радуйся, Владычице мира, от наветов злых духов и человеков нас Покрывающая.

Кондак 4

   Буря недоумения смущает ми ум, како возмогу недостойными усты восхвалити Тя, Пресвятая Дево, за Твое великое нам вспоможение. Тем же, величая неисчетныя Твоя милости, смиренномудренно пою Вседержителю Богу: Аллилуиа.

Икос 4

   Слышаша Вифлеемстии пастырие ангелов, поющих Христово Рождество, текше в пещеру, обретоша тамо Богородительницу, на руках держащую Превечнаго Младенца. С ними в веселии духовнем и мы Тебе, яко общей Матери глаголем тако:
   Радуйся, младенцев воспитание;
   радуйся, отрокам смысла Подательница.
   Радуйся, юношей Руководительнице;
   радуйся, добрых дев величание.
   Радуйся, возрастных и мужей премудростию обогащающая;
   радуйся, жен стыдением и кротостию наделяющая.
   Радуйся, старцев благоговейных сладкое успокоение;
   радуйся, стариц боголюбивых тихое прибежище.
   Радуйся, честных браков устроение;
   радуйся, вражды, ссоры между единокровных разрушение.
   Радуйся, благочестивых семейств благословение;
   радуйся, девства похвало и возвышение.
   Радуйся, Владычице мира, от наветов злых духов и человеков нас Покрывающая.

Кондак 5

   Боготечною звездою являешися, Царице небесная, всем под покров Твой всемощный прибегающим и непрестанно в умилении сердечном вопиющим к Богу: Аллилуиа.

Икос 5

   Видя праведный Симеон Тя, пришедшую с Младенцем Иисусом во храме представитися Господеви, рече: "Тебе же Самой душу пройдет оружие", проразумевая Матерния Твоя страдания о Сыне Твоем Божественном и о всех гонимых за Имя Его Святое. Сего ради зовем Ти:
   Радуйся, пастырей Церкви, от мира поносимых, прославление;
   радуйся, рабов Божиих осмеиваемых ободрение.
   Радуйся, стоящих за правду защищение;
   радуйся, томимых горькими работами облегчение.
   Радуйся, яко невинно осужденных свобождаеши;
   радуйся, яко из изгнания скоро возвращаеши.
   Радуйся, во узах сидящих благодатно посещающая;
   радуйся, терпеливых страдальцев предвкушением блаженства услаждающая.
   Радуйся, сердца злых людей, враждующих противу нас, смягчающая;
   радуйся, советы лукавыя и коварство их разоряющая.
   Радуйся, от разбойников на пути ны охраняющая;
   радуйся, татей и тайных убийц от домов наших отводящая.
   Радуйся, Владычице мира, от наветов злых духов и человеков нас Покрывающая.

Кондак 6

   Проповедницы Твоея благодатныя помощи суть все множество Тобою спасенных: страждущих, болящих, скорбящих и грехми обремененных, благодарственно о Тебе поющих Богу: Аллилуиа.

Икос 6

   Возсия Божественный свет во Египте и падоша тамо идоли, егда бежала еси, Пречистая, с Богомладенцем Иисусом, спасаяся от убийства Иродова. Ты убо озарявши светом Боговидения умы и всех удаляющихся прелестей суетнаго мира, исторгая из душ их кумиры, гнездящихся тамо губительных страстей. Темже превозносим Тя словесы сими:
   Радуйся, сумнящихся в вере вразумление;
   радуйся, гордых умом своим смирение.
   Радуйся, озлобленных и гневом палимых укрощение,
   радуйся, ропщущих на промысл Божий с тяготами жизни примирение.
   Радуйся, яко дерзких ругателей Бога и Святыни Его незримо караеши;
   радуйся, яко заблудших на путь спасения наставляеши.
   Радуйся, суеверных и гадателей посрамление;
   радуйся, развращенных и нечистивых обличение.
   Радуйся, яко душевредныя учения низлагаеши;
   радуйся, яко истину познавати помогаеши.
   Радуйся, мрак хулы, срамословия и всякия лжи разсееваеши;
   радуйся, светом Святаго Евангелия люди просвещаеши.
   Радуйся, Владычице мира, от наветов злых духов и человеков нас Покрывающая.

Кондак 7

   Хотящи николиже отлучатися от рожденнаго Тобою Спасителя мира, Ты, Богоблаженная, пребывала еси с Ним неотлучно во граде Назарете, детоводя и питая Его, яко человека и поя в сердце Своем яко Богу. Аллилуиа.

Икос 7

   Новую показуя Матернюю любовь к Сыну Твоему, со скорбию искала Его, двоюнадесятилетняго Отрока, во граде Иерусалиме в праздник Пасхи "мнеша Его в дружине суща". Ведуще таковое Твое сердоболие со умилением вопием Ти:
   Радуйся, обидимых и огорченных возвышающая;
   радуйся, ненавидимых и всеми отверженных честию величающая.
   Радуйся, убогих и нагих одеяние;
   радуйся, нищих и разоренных - питание.
   Радуйся, бездомных, странных, вдов и сирот призрение;
   радуйся, неимущим работы поможение.
   Радуйся, путешествующим благополучное к дому возвращение;
   радуйся, заблудших в пути к жилищу приведение.
   Радуйся, детям неудобоучащимся в разум обновляющая;
   радуйся, умом и нравом простых Своею помощью не оставляющая.
   Радуйся, ненадежных надеяние;
   радуйся, уповающих на волю Божию наслаждение.
   Радуйся, Владычице мира, от наветов злых духов и человеков нас Покрывающая.

Кондак 8

   Странное и предивное Твое попечение бысть с христианех на всех путех их жизни многомятежней и многотрудней. Имея в Тебе столь милосердую и независтную Помощницу вси облагодетельствованные Тобою велегласно поют Богу: Аллилуиа.

Икос 8

   Вся была еси со Христом при служении Его роду человеческому, како и божественный евангелист Лука повествует о Тебе, глаголя: "Мати Твоя и братия [Твоя] вне стоят видети Тя хотяше" *). Мним, яко Ты, Всеблагая Мати, неотступно пребываеши и со всеми труждающимися во Славу Божию, восхваляющими Тя тако:
   Радуйся, правителей, яко слуг Божиих, поставляющая,
   радуйся, сущих во власти к торжеству добра направляющая.
   Радуйся, святителей правилом веры и образом благочестия украшающая;
   радуйся, пастырей ревностию о спасении чад духовных снабдевающая.
   Радуйся, наставников совершенный разуме;
   радуйся, учащихся в науках преуспеяние.
   Радуйся, вождей и воинов к защите веры и родины побуждающая;
   радуйся, инокам и инокиням в борьбе с прилогами мира и плоти пособляющая.
   Радуйся, судей святое зерцало правды;
   радуйся, врачей искусное больных врачевание.
   Радуйся, земледельцев Соработнице и Благая Помощнице;
   радуйся, всех честне трудящихся покой и надежное пристанище.
   Радуйся, Владычице мира, от наветов злых духов и человеков нас Покрывающая.

Кондак 9

   Всяк возраст верных благопользуется Твоим попечением, Всемилостивая Мати, яко всегда, к Тебе прибегающим, душеполезное даруеши, потребная в житии доставлявши и усердно ходатайствуеши за ны немощныя и грешныя у Престола Господа Славы, Ему же поем: Аллилуиа.

Икос 9

   Ветия многовещанныя не могут изглаголати Твоея Матерния печали при Кресте Сына Твоего бывшей, егда видела еси Его страждуща за вся человеки мукою неизглаголанною. Тем же, яко искушенней по всяческим и сострадати в самых тяжких скорбях и лишениях нам могущей, взываем Ти:
   Радуйся, слепых прозрения;
   радуйся, глухих слышание.
   Радуйся, недужных здравие;
   радуйся, в злоключения впавших земныя суеты познание.
   Радуйся, хромых хождение;    радуйся, разслабленных телом исцеление.
   Радуйся, стужаемых от бесов избавление;
   радуйся, поврежденных умом просветление.
   Радуйся, неисцельно больных на Свои всемощныя руце приемлющая;
   радуйся, от злых навыков - опивства, брани, игралищ изъемлющая.
   Радуйся, отчаянных грешников моления не отвергающая;
   радуйся, от пагубнаго безволия их похищающая.
   Радуйся, Владычице мира, от наветов злых духов и человеков нас Покрывающая.

Кондак 10

   Спасти хотя мир, иже всех Господь, сый на Кресте, дарова всему миру Пресвятую, Премилосердую Матерь, егда изрек Пренепорочной и возлюбленному ученику: "Се сын Твой" и "Се Мати твоя". Благодаряще за сие Всеблагаго Бога, глаголем Ему: Аллилуиа.

Икос 10

   Стена крепка явилася еси по завету Господа, Преблагословенная, даруя всем благоденствие, мир, отраду, радость, яко и Сама все сие первая получила еси от Воскресшаго Христа Спасителя, услышав от Него приветственный глас: "Радуйтеся". Сего ради ублажаем Тя тако:
   Радуйся, всякую ненависть, злобу, вражду в нас укрощающая;
   радуйся, мир о Дусе Святе в сердце вселяющая.
   Радуйся, зависть, клевету, ревность и злопамятство истребляющая;
   радуйся, братолюбием нас ущедряющая.
   Радуйся, от глада, хлада, труса, потопа, огня, меча ограждающая;
   радуйся, хлебом насущным нас питающая.
   Радуйся, смертоносную язву прекращающая;
   радуйся, гнев Божий, праведно на ны движимый, утоляющая.
   Радуйся, праведных дел наших поспешение;
   радуйся, на всех путех жизни нашея промышление.
   Радуйся, родителей благонравием детей утешающая;
   радуйся, рабов Божиих тихим и безмолвным житием награждающая.
    Радуйся, Владычице мира, от наветов злых духов и человеков нас Покрывающая.

Кондак 11

   Пение наше смиренное от полноты любве и усердия Тебе приносимое не презри, Богоневесто, и не отвратися от нас грешных и недостойных, но помози нам очиститися от всякия скверны плоти и духа, да возможем достойно и праведно пети Богу: Аллилуиа.

Икос 11

   Светом руководствующим являлася еси апостолом, Богородительнице, по вознесении Сына Твоего на небо. Таковою остаешися даже до сего дне всем хотящим спаститися и в разум истины приити. Не лиши, о Всеблагая, Твоего святаго водительства и нас в житейском море треволнений обуреваемых, обаче от сердца приносящих Тебе благохваления таковая:
   Радуйся, нечистыя помыслы пожигающая;
   радуйся, от греховных чувств отрезвляющая.
   Радуйся, искушения и соблазны от нас прогоняющая;
   радуйся, к покаянию и исправлению подвизающая.
   Радуйся, слезами сокрушения бездну беззаконий наших омывающая;
   радуйся, духовно бодрствовати нам помогающая.
   Радуйся, ум и сердце к горнему возводящая;
   радуйся, все земное презирати понуждающая.
   Радуйся, к трезвению и молитве приводящая;
   радуйся, блаженство духа тем уготовляющая.
   Радуйся, подвижников благочестия явное подкрепление;
   радуйся, всех верных дивное спасение.
   Радуйся, Владычице мира, от наветов злых духов и человеков нас Покрывающая.

Кондак 12

   Благодать Божественную испроси нам у Сына Твоего и Бога, простри руку помощи, да не погибнем во гресех и лютых обстояниях, находящих на ны от враг видимых и невидимых. Умиротвори наши сердца, злобою и враждою исполненныя, да утешеннии Тобою, радостно зовем Богу: Аллилуиа.

Икос 12

   Поюще честно Твое Успение, прославляем и Покров Твой Святый, распростертый над всем миром, наипаче же родом христианским, прославляющим Тя тако:
   Радуйся, покаянием к исходу от сея жизни нас приуготовляющая;
   радуйся, болезньми от грехов очищающая.
   Радуйся, яко от напрасныя смерти предохраняеши;
   радуйся, яко последняго напутствия достойныя сподобляеши.
   Радуйся, скорое разрешение души от тела в предсмертных муках посылающая.
   Радуйся, мирную кончину дарующая;
   радуйся, горьких мытарств избавляющая.
   Радуйся, христианского погребения не лишающая;
   радуйся, ко Господу выну о нас предстательствующая.
   Радуйся, в жизни и по смерти с нами пребывающая;
   радуйся, "Радосте наша", двери райския нам отверзающая.
   Радуйся, Владычице мира, от наветов злых духов и человеков нас Покрывающая.

Кондак 13

   О, Владычице мира, приими сие малое благодарение наше, от всего сердца Тебе приносимое, и не попусти нам николиже охладевати в сем благодарном чувстве, но вразуми нас всегда помнити Твоя неисчетныя милости и со слезами умиления вопити о Тебе Богу: Аллилуиа, аллилуиа, аллилуиа.

   (Этот кондак читается трижды, затем - икос 1 и кондак 1).

***

МОЛИТВА
ко  ПРЕСВЯТОЙ  БОГОРОДИЦЕ

   О, Пресвятая Дево Богородице, Премилостивая Мати всех христиан, наипаче же скорбящих, гонимых и многоразличными недугами одержимых! Аз, яко нищ и убог душею и телом, представ пред святым Твоим образом, со слезами и умильно прошу Твоего благодатного подаяния. Ничтоже бо доброе и благое во мне есть, - весь обложен немощами, нищетою и убожеством, - нозе мои не обувени, дабы поспешати ми на дела святыя и богоугодные; руце мои загрязнены от множества содеянных мною беззаконий; очи мои потуплены от нечистоты совести. Зане не возмогут взирати на благолепие красоты Твоея, явленныя нам в чудотворном Твоем образе "Покрывающая". Все лице мое потемнено и испещрено печатью безчисленных моих пороков и грехопадений. Несть во мне ни спасительныя веры, ни утешительныя надежды, ни благостныя любве; аз есмь яко гнилостный сосуд, преисполненный всякия скверны: гордости, себялюбия, высокоумия, тщеславия, гнева, раздражительности, злобы, памятозлобия, недоброжелательства, зависти, ревности, осуждения, ропота, злословия, празднословия, лукавства, лести, обмана, лицемерия, уныния, нетерпения, малодушия, невоздержания душевных и телесных чувств, пристрастия, плотоугодия, всякаго сладострастия и иных тьмочисленных страстей.
   И яково мое убожество духовное, таково же и телесное - болезни и напасти обдержаша мя и все житие мое, яко трость ветром колеблема, полна непостоянства, страха и всякия опасности. По глаголу святаго апостола: беды от духов злобы поднебесныя; беды от ненавидящих, обидящих и враждующих противу меня человеков; беды от зверей, скотов и гад земных; беды от стихий мира - молнии, огня, воды, тлетворнаго воздуха, хлада, глада; беды от многих немощей и болезней моего тела; беды на пути и в дому; беды во дни и в нощи...
   Кто же мя поддержит, кто сохранит, кто от врагов избавит, кто к добродетели направит, кто болезни моя исцелит, кто утешит, упокоит, вразумит, наставит, спасет и помилует аще не Ты, Пресвятая Мати, Заступница и Покровительница моя Всеблагая! Ты разсеянный по миру ум мой собери, помыслы от всякия скверны очисти; чувства, отравленныя всяцем злом, освежи; волю мою, дряблую на все доброе, укрепи и от пагубнаго безволия мя избави; сердце от страстей свободи и святой любовию к Богу и ближним наполни; всю внутреннюю храмину мою переустрой и удобным жилищем Духа Святаго соделай.
   Не остави мя, Премилосердая Владычице, и в телеснем моем многоскорбнем житии: болезни потреби; враги видимые и невидимые разжени; злыя обстояния разруши; страх, приходящий от духов злобы и человеков, хотящих мя погубити, отжени; вся потребныя и нужная ми даруй, бодрость духа пошли.
   Да обновленный, да очищенный, да утешенный Тобою, Царица моя Пресвятая, прославлю Святую Троицу - Отца и Сына и Святаго Духа и Твое дивное о мне попечение и ныне и присно и во веки веков.
   Аминь.
-------------
 *) (Лк. 8.20).

   Вы можете прослушать Молитву пред иконой Божией Матери "Покрывающая", читаемую священником Серафимо-Знаменского скита иереем Андреем Гусевым и пение Величания Пресвятой Богородице хором сестер обители, нажав на белый треугольничек...

Категория: Иконе Божией Матери "Покрывающая" | Добавил: admin (12.04.2008) | Автор: Admin
Просмотров: 8612 | Рейтинг: 5.0/12 |
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]